За нас

  Советот е ново и посебно тело во рамките на Здружение на судии на Република Северна Македонија што ги обединува судиите и новинарите и поттикнува дискусија за прашања од заеднички интерес, насочени кон понатамошно зајакнување на судската транспарентност и овозможување на јавен пристап до информации за судски случаи.

С.М.С. е завршен резултат од двегодишниот проект „Подобрување на капацитетите на судството во Република Северна Македонија“, спроведен од Здружението на судиите со поддршка и соработка на Амбасадата на Соединетите Американски држави во Република Северна Македонија. Ноговото формирање се јави како реакција на недостигот на комуникација помеѓу судовите и јавноста.

Моделиран по премерот на Судско-медиумската комисија при Врховниот суд на Масачусетс, Судско-медиумскиот совет е американско практично решение втемелено на европските принципи и начела на судска транспарентност и јавност, содржани во одлуките на ССЈЕ (Европскиот консултативен совет на судиите). Неговата цел е да ги унапреди односите помеѓу медиумите и судовите во Северна Македонија во делот на отворена комуникација, снимање и следење на судења, пристапот на јавноста до судски и предметни информации, како и изнаоѓање на механизми за превенција од дезинформации. Европската комисија во извештаите за напредокот на земјата во 2018 и 2019 година го нотира Советот како позитивно решение за зајакнување на судската транспарентност во земјата.

Преку своите активности, Советот не само што ја поттикнува дискусијата меѓу судиите, правните практичари, експертите и медиумите, туку и овозможува континуирано учење и зајакнување на вештините преку посебните школи „Правна школа за новинари“ и „Новинарска школа за судии“. Целта е заемно запознавање на двете професии, градење на коректни и професионални односи и зајакнување на јавната доверба во судовите.